JOOYLOO NGA SA MAG

Baabakar Lóo, ndongo-daara la ca Pari, di fa jàng matematig. Woyam wu daw-yaram wii, Jaari Sow la ciy waxal, naan ko gaawal delsi Jaari, loolu rekk a mën a dakkal sama tiis ak sama njàqare.

*
Wër naa la fu ne gisuma la

Bu dee yaa ngi may wuyu itam dégguma la

Seet naa ci biir seet ci biti

Waaye lu lay màndargaal sax nekku fi

Fan la la jant biy tiim ?

Dañu laa làq am dangaa réer ?

Waxal ak man rakk sama

Fu mu doon ma jëlsi la fa

Yaay-bóoy lekkatul

Sa xarit benn bakkan nelawatul

Sa mag liggéeyatul

Ndax xel moo dalatul

Fan la la jant biy tiim ?

Dañu laa làq am dangaa réer ?

Waxal ak man rakk sama

Fu mu doon ma jëlsi la fa

Réew mépp a am mbetteel

Ñu baax ñépp a jaaxle

Ndax yaw mi ñu xamul foo ne

Ba tax ñu tàmbali di la wër ca teel

Fan la la jant biy tiim ?

Dañu laa làq am dangaa réer ?

Waxal ak man rakk sama

Fu mu doon ma jëlsi la fa

Samam xel mi ngi xalaat lu ne

Samag kàttan mayu ma ma xam ci loo ne

Waaye samay ñaan dinañu la fekk fépp foo ne

Samaw làmmiñ di wax Buur bi aar la ni muy aare gone.

BAABAKAR LÓO